ନୂଆଦିଲ୍ଲୀ : ଯଦି ଆପଣଙ୍କ ବ୍ୟାଙ୍କ ଆକାଉଣ୍ଟକୁ ଅଚାନକ କୋଟି କୋଟି ଟଙ୍କା ଚାଲିଆସିବ ତେବେ ଆପଣ କ’ଣ କରିବେ ? ଏମିତି କିଛି ହୋଇଛି ଗ୍ରେଟର ନୋଏଡାର ୨୦ ବର୍ଷୀୟ ଦୀପକଙ୍କ ସହିତ । କୋଟାକ ମହିନ୍ଦ୍ରା ବ୍ୟାଙ୍କରେ ଦୀପକଙ୍କ ମା’ଙ୍କ ଖାତା ଥିଲା । ମା’ଙ୍କ ଦେହାନ୍ତ ପରେ ଦିନେ ଅଚାନକ ତାଙ୍କ ଖାତାକୁ ୧ ସେପ୍ଟିଲିୟନ ଟ୍ରିଲିୟନ୍ ଟଙ୍କା ଆସିଲା । ଏହି ରାଶି ଏତେ ବଡ ଯେ ୧ ଆଗରେ ୩୬ଟି ସଂଖ୍ୟା ଲେଖିବାକୁ ହେବ । ଅର୍ଥାତ୍ ସମୁଦାୟ ୩୭ ସଂଖ୍ୟା ବିଶିଷ୍ଟ ରାଶି ତାଙ୍କ ମା’ଙ୍କ ଖାତାକୁ ଆସିଥିଲା । ତେବେ ଏହି ଘଟଣା ପରେ ସେହି ଖାତାକୁ ଫ୍ରିଜ୍ କରିଦିଆଯାଇଛି ଏବଂ ଘଟଣାର ଯାଞ୍ଚ ଚାଲିଛି ।
ତେବେ ଖବରଟି ଭାଇରାଲ ହେବାରେ ଲାଗିଛି । ସାମାଜିକ ଗଣମାଧ୍ୟମରେ ସେହି ରାଶିର ଫଟୋ ଭାଇରାଲ ହେବା ପରେ ସମସ୍ତେ ଚକିତ ହୋଇଛନ୍ତି । ଅନ୍ୟପଟେ କୋଟାକ ମହିନ୍ଦ୍ରା ବ୍ୟାଙ୍କ ଭାଇରାଲ ଖବରରେ ବୟାନ ଜାରି କରି କହିଛି କି ଉପଭୋକ୍ତାଙ୍କ ଖାତାକୁ ଆସିଥିବା ଏହି ରାଶି ଖବର ଭୁଲ୍ । ଗ୍ରାହକ ନିଜ ଖାତାର ସୂଚନା ମୋବାଇଲ ବ୍ୟାଙ୍କ ଆପ୍ ବା ନେଟ୍ ବ୍ୟାଙ୍କିଂ ଜରିଆରେ ଯାଞ୍ଚ କରିବା ପାଇଁ ବ୍ୟାଙ୍କ ଅନୁରୋଧ କରିଛି ।
ସୂଚନା ଅନୁସାରେ ଦୀପକଙ୍କ ମା ଗାୟତ୍ରୀ ଦେବୀଙ୍କ ୨ ମାସ ତଳେ ପରଲୋକ ହୋଇଥିଲା । ୩ ଅଗଷ୍ଟ ରାତିରେ ଏକ ଦୀପକଙ୍କୁ ଏକ ନୋଟିଫିକେସନ୍ ମିଳିଥିଲା ଯେଉଁଥିରେ ୧.୧୩ ଲକ୍ଷ କୋଟି ଟଙ୍କା ଜମା ହୋଇଥିବା ଜଣାପଡିଥିଲା । ଚିନ୍ତିତ ହୋଇ ସେ ନିଜ ସାଙ୍ଗକୁ ଏହାର ଏକ ସ୍କ୍ରିନସଟ୍ ପଠାଇ ଶୂନ ଗଣିବାକୁ କହିଥିଲେ । ଏହା ପରେ ଏହି ଖବର ଭାଇରାଲ ହୋଇଯାଇଥିଲା ।