ଭୁବନେଶ୍ବର: ପୂର୍ତ୍ତ ବିଭାଗର ବିନା ସ୍ବୀକୃତିରେ ବିଏମ୍ସି ରାସ୍ତା ଖୋଳୁଛି। ରାସ୍ତା ଖୋଳି କେଉଁଠି ସେଡ୍ ପାଇଁ ବାଉଁଶ ପୋତୁଛି ଆଉ କେଉଁଠି ଶିବିର ପ୍ରସ୍ତୁତ କରୁଛି। ଏଥିପାଇଁ ପୂର୍ତ୍ତ ବିଭାଗର ମୁଖ୍ୟଯନ୍ତ୍ରୀ(ରାସ୍ତା-୧) ବିଏମ୍ସି ସିଟି ଇଞ୍ଜିନିୟରଙ୍କୁ ଚିଠି ଲେଖିଛନ୍ତି। ପୂର୍ତ୍ତ ବିଭାଗର ବିନାନୁମତିରେ ରାସ୍ତାରେ ଏଭଳି ଗାତ ଖୋଳିପାରିବ ନାହିଁ। ଏଥିରେ ରାସ୍ତା ନଷ୍ଟ ହେବା ସହ ଏହାରେ ସ୍ଥାୟିତ୍ବ କମୁଛି। ଥରେ ଖୋଳା ହୋଇଗଲେ ଏହାକୁ ବନ୍ଦ କରାଯାଉ ନାହିଁ। ଏ ନେଇ ପୂର୍ତ୍ତ ବିଭାଗ ଜାଣି ପାରୁନାହିଁ। ଏଣୁ ଏହି ଗାତ ଯୋଗୁ ରାସ୍ତା କ୍ରମଶଃ ଦୁର୍ବଳ ହୋଇଯାଉଛି। ସେହି ଗାତ ବଢ଼ିବଢ଼ି ବଡ଼ ଗାତ ହୋଇଯାଉଛି। ଲୋକଙ୍କ ଯାତାୟାତ ପାଇଁ ଏହା ବିପଦ ହେଉଛି। ମୁଖ୍ୟଯନ୍ତ୍ରୀଙ୍କ ଚିଠି ମୁତାବକ, ବିଏମ୍ସି ବେହେରାସାହି ଛକ, ସିଟି ମହିଳା ମହାବିଦ୍ୟାଳୟ ଛକ, ଡିଏଭି ସ୍କୁଲ୍ ଛକ, ୟୁନିଟ୍-୮, ୧୨୦ ବାଟାଲିୟନ ଛକ ସମେତ ଏକାଧିକ ସ୍ଥାନରେ ବିଏମ୍ସି ଅସ୍ଥାୟୀ ସେଡ୍ ନିର୍ମାଣ କରିଛି। ଏଥିପାଇଁ ପିଚୁ ରାସ୍ତା ଖୋଳି ଦିଆଯାଇଛି। ଏହି ଗାତରେ ପାଣି ରହିଗଲେ ପୁରା ରାସ୍ତାକୁ ପ୍ରଭାବିତ କରିବ। ଫଳରେ ରାସ୍ତା ନଷ୍ଟ ହେବ। କୋଟିକୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ରାସ୍ତା ଏଭଳି ୧୦/୧୨ଟି ଗାତ ପାଇଁ ନଷ୍ଟ ହୋଇଯିବା ଯୋଗୁ ପୂର୍ତ୍ତ ବିଭାଗର ରାସ୍ତା ଓ କୋଠାବାଡ଼ି ବିଭାଜନ ବଦନାମ ହେଉଛି ଏବଂ ଖର୍ଚ୍ଚାନ୍ତ ହେଉଛି। ଅନେକ ଜାଗାରେ ପେଭରବ୍ଲକ୍ ମଧ୍ୟ ନଷ୍ଟ ହେଉଛି। ଏଣୁ ଏଭଳି ବେଆଇନ ଖୋଳାଖୋଳି ତୁରନ୍ତ ବନ୍ଦ କରିବାକୁ ମୁଖ୍ୟଯନ୍ତ୍ରୀ ତାଗିଦ୍ କରିଛନ୍ତି।
କେବଳ ଏହି ସେଡ୍ ନୁହେଁ, ବରଂ ବିଭିନ୍ନ ଜାଗାରେ ବିଏମ୍ସି ଜଳସେବା ଶିବିର ପାଇଁ ଅନୁମତି ଦେଇଛି। ରାସ୍ତା କଡ଼ରେ ଥିବା ପେଭରବ୍ଲକ୍କୁ ଭାଙ୍ଗି ଏହି ଶିବିର ପାଇଁ ସେଡ୍ ତିଆରି କରାଯାଉଛି। ବିଏମ୍ସି ଏହାକୁ ସିଧାସଳଖ ପ୍ରସ୍ତୁତ କରୁନାହିଁ। ବରଂ ବିଭିନ୍ନ ସଂସ୍ଥାକୁ ଦେଇଦେଇଛି। ଫଳରେ ସେମାନେ ମନଇଚ୍ଛା ଖୋଳୁଛନ୍ତି। ଶିବିର ସରିବା ପରେ ସେମିତି ଗାତ ଛାଡ଼ି ଦେଇ ଚାଲିଯାଉଛନ୍ତି। ଫଳରେ ପେଭରବ୍ଲକ୍ ନଷ୍ଟ ହେଉଛି। ଗାତରେ ପାଣି ଜମିବା ଫଳରେ ମାଟିତଳେ ନରମ କରିଦେବାରୁ ସେହି ଜାଗା ଦବି ଯାଉଛି। ପୂର୍ବରୁ ବିଏମ୍ସି ପୂର୍ତ୍ତ ରାସ୍ତାରେ ବିଭିନ୍ନ ଘରୋଇ ସଂସ୍ଥାଙ୍କୁ କେବୁଲ୍ ବିଛାଇବା ପାଇଁ ସ୍ବୀକୃତି ଦେଉଥିଲା। ଏ ନେଇ ପୂର୍ତ୍ତ ବିଭାଗ ଠାରୁ କୌଣସି ସ୍ବୀକୃତି ନେଉ ନଥିଲା। ଫଳରେ ରାସ୍ତା ନଷ୍ଟ ହେଉଥିଲା। ଗାତ ଖୋଳା ହୋଇ ପଡ଼ିରହିବା ଫଳରେ ପ୍ରବଳ ଟ୍ରାଫିକ୍ ସମସ୍ୟା ସୃଷ୍ଟି ହେଉଥିଲା। ପରେ ଏହାକୁ ମରାମତି କରାଯାଉଥିଲେ ମଧ୍ୟ ଆଉ ଦୀର୍ଘସ୍ଥାୟୀ ହେଉ ନଥିଲା। ଠିକ୍ ସେହି ଜାଗାରେ ହିଁ ରାସ୍ତା ନଷ୍ଟ ହୋଇଯାଉଥିଲା। ଏ ନେଇ ବାରମ୍ବାର ପୂର୍ତ୍ତ ବିଭାଗ ତାଗିଦ୍ କରିଥିଲେ ମଧ୍ୟ ବିଏମ୍ସି ଶୁଣିନଥିଲା। ସେହି ପ୍ରକ୍ରିୟା ଏବେ ବି ଜାରି ରହିଛି।