କେନ୍ଦୁଝର: ନେତାଜୀ ସୁଭାଷ ଚନ୍ଦ୍ର ବୋଷ ବ୍ୟବହାର କରୁଥିବା ଫୋର୍ଡ କାର୍ ଧାନବାଦସ୍ଥିତ ଭାରତ କୁକିଂ କୋଲ୍ ଲିମିଟେଡ ପରିସରରେ ପରିତ୍ୟକ୍ତ ଅବସ୍ଥାରେ ପଡ଼ିଛି। ଏହି କାର୍କୁ ଓଡ଼ିଶା ଆଣିବା ପାଇଁ ପୂର୍ବ ସରକାରଙ୍କୁ ଭାରତ କୁକିଂ କୋଲ୍ ଲିମିଟେଡ୍ର ସ୍ବାଧୀନ ନିର୍ଦ୍ଦେଶକ ସତ୍ୟବ୍ରତ ପଣ୍ଡା ଅନୁରୋଧ କରିଥିଲେ। ହେଲେ ତତ୍କାଳୀନ ସରକାର ଏ ଦିଗରେ କୌଣସି ପଦକ୍ଷେପ ନ ନେବାରୁ କାର୍ଟି ଓଡ଼ିଶା ଆସିପାରି ନଥିଲା। ନୂଆ ସରକାର ଏ ଦିଗରେ ପଦକ୍ଷେପ ନେଇ ନେତାଜୀଙ୍କ ସ୍ମୃତିକୁ ଓଡ଼ିଶା ଆଣି ସଂରକ୍ଷିତ ରଖିବେ ବୋଲି ଆଶା କରାଯାଉଛି।
ଧାନବାଦସ୍ଥିତ ଭାରତ କୁକିଂ କୋଲ୍ ଲିମିଟେଡ୍ର ସ୍ବାଧୀନ ନିର୍ଦ୍ଦେଶକ ଥିଲେ ଓଡ଼ିଶାର ବରିଷ୍ଠ ବିଜେପି ନେତା ସତ୍ୟବ୍ରତ ପଣ୍ଡା। ସେ କାର୍ଯ୍ୟାଳୟ ପରିସରରେ ଏକ ପରିତ୍ୟକ୍ତ କାର୍ ଦେଖିବାକୁ ପାଇଥିଲେ। ଏ ସମ୍ପର୍କରେ ତଥ୍ୟ ସଂଗ୍ରହ କରିବାବେଳେ ତାହା ନେତାଜୀଙ୍କ କାର୍ ବୋଲି ସୂଚନା ପାଇଥିଲେ। ତଥ୍ୟ ଅନୁସାରେ, ନେତାଜୀ ଫୋର୍ଡ କମ୍ପାନି ଦ୍ବାରା ନିର୍ମିତ ସୁପର ଡିଲକ୍ସ କାର୍ ବ୍ୟବହାର କରୁଥିଲେ। ଯାହାର ନମ୍ବର ଥିଲା (ବିଆର୍ଆର୍-୩୨୦୧)। ଏହାର ଇଞ୍ଜିନ୍ ନମ୍ବର ଏସ୍ଡି-୧୦୮୪୫୯-ଏଫ୍ ଏବଂ ଚେଚିସ୍ ନମ୍ବର ୨୬୧୭-ଏସ୍ଡିଏଏନ୍ଟି-ଏମ୍-୧୩୨୨୦। ତେବେ ଏହି କାର୍ର ପ୍ରକୃତ ମାଲିକ ହେଉଛନ୍ତି ସୁଭାଷଙ୍କ ମାମୁ ଅଶୋକ ବୋଷ। କାର୍ଟି ତାଙ୍କ ନାମରେ ରହିଛି। ଅଶୋକ କୋକ୍ ପ୍ଲାଣ୍ଟରେ କେମିକାଲ ଇଞ୍ଜିନିୟର ଭାବେ କାମ କରୁଥିଲେ। ନେତାଜୀ ସ୍ୱାଧୀନତା ସଂଗ୍ରାମରେ ସାମିଲ ହେବାପରେ ୧୯୩୦ ମସିହାରୁ ୧୧ ବର୍ଷ ଧରି ଏହି କାର୍କୁ ବ୍ୟବହାର କରୁଥିଲେ ବୋଲି ଜଣାପଡ଼ିଛି। ଟାଟା ଶ୍ରମିକ ସଂଗଠନର ସଭାପତି ଦାୟିତ୍ୱ ତୁଲାଉଥିବା ସୁଭାଷ ଅନେକ ସମୟରେ ସଂଗଠନ କାମରେ ଧାନବାଦ ଆସୁଥିଲେ।
ଭାରତ କୁକିଂ କୋଲ୍ କାର୍ଯ୍ୟାଳୟରେ ପଡ଼ିରହିଛି
ପୂର୍ବ ସରକାର ଆଗ୍ରହ ଦେଖାଇ ନଥିଲେ
ସେତେବେଳେ ସେ ଏହି ଫୋର୍ଡ କାର୍କୁ ବ୍ୟବହାର କରୁଥିଲେ ବୋଲି ସୂଚନା ମିଳିଛି। ବହୁବର୍ଷ ଧରି ବ୍ୟବହାର କରିବା ପରେ କାର୍ଟି ଅଚଳ ହୋଇଯାଇଥିଲା। ସୁଭାଷଙ୍କ ମାମୁ ତାହାକୁ ଏକ କବାଡ଼ିବାଲାକୁ ବିକ୍ରି କରିଦେଇଥିଲେ। ୨୦୧୪ରେ ସୁଭାଷ ବ୍ୟବହାର କରୁଥିବା ଏହି କାର୍କୁ କୁକିଂ କୋଲ୍ର ମୁଖ୍ୟ ଶ୍ରୀ ଲାହୋରୀ ଠାବ କରିଥିଲେ। ପୁଟ୍କି ବଲ୍ଲିହାରୀଠାରେ ଥିବା କବାଡ଼ିବାଲାଠାରୁ ସେ କାର୍ଟିକୁ କିଣି ଆଣିବା ପରେ କୋକ୍ ପ୍ଲାଣ୍ଟର ଅତିଥିଭବନରେ ରଖିଥିଲେ। ଖୋଲା ଆକାଶ ତଳେ କାର୍ଟି ପଡ଼ିରହିବା ଯୋଗୁଁ ନଷ୍ଟ ହୋଇ ମାଟିରେ ମିଶିବାକୁ ବସିଛି ବୋଲି ସତ୍ୟବ୍ରତ ପଣ୍ଡା କହିଛନ୍ତି। ଏ ସମ୍ପର୍କରେ ସେ ପୂର୍ବ ସରକାରଙ୍କ ସହ ଯୋଗାଯୋଗ କରିଥିଲେ। କାର୍ଟିକୁ ଓଡ଼ିଶା ଫେରାଇ ଆଣି ସଂଗ୍ରହାଳୟରେ ରଖାଗଲେ, ପରବର୍ତ୍ତୀ ପିଢ଼ି ଅନେକ କଥା ଜାଣିପାରିବେ ବୋଲି କହିଥିଲେ। ମାତ୍ର ପୂର୍ବ ସରକାର ଏ ଦିଗରେ କୌଣସି ପଦକ୍ଷେପ ନେଲେ ନାହିଁ ବୋଲି ଶ୍ରୀ ପଣ୍ଡା କହିଛନ୍ତି।